Act 4 | NdeIBE | STEP | Abaphristi lomlawuli wabalindi bethempeli kanye labaSadusi beza kuboPhethro loJohane belokhu besakhuluma labantu.

Acts 4

UPhethro LoJohane Phambi KweSanihedrini

1 Abaphristi lomlawuli wabalindi bethempeli kanye labaSadusi beza kuboPhethro loJohane belokhu besakhuluma labantu. 2 Bakhathazeka kakhulu ngokuba abaphostoli babefundisa abantu betshumayela ukuthi kuJesu kulokuvuka kwabafileyo. 3 Bababamba oPhethro loJohane, kwathi ngoba kwasekuntambama, babafaka entolongweni kwaze kwaba kusasa.

4 Kodwa abanengi abalizwayo ilizwi bakholwa, inani lamadoda lakhula okungaba yizinkulungwane ezinhlanu.

5 Ngosuku olulandelayo ababusi, labadala, labafundisi bomthetho babuthana eJerusalema.

6 U-Anasi umphristi ophezulu wayekhona, kanye loKhayifasi, loJohane, lo-Alekizanda lamanye amadoda awendlu yomphristi ophezulu. 7 Bathi uPhethro loJohane kabalethwe phambi kwabo base bebathonisisa bathi: “Lokhu likwenze ngamandla bani kumbe ngaliphi ibizo na?”

8 UPhethro egcwele uMoya oNgcwele wathi kubo: “Babusi labadala babantu! 9 Uba sibekwa umlandu lamuhla ngesenzo somusa owenzelwe isigoga, besesibuzwa ukuthi usiliswe njani,

10 yazini lokhu, lina kanye labo bonke abantu bako-Israyeli: Kungenxa yamandla kaJesu Khristu waseNazaretha elambethelayo kodwa uNkulunkulu wamvusa kwabafileyo ayiwo enza indoda le ime phambi kwenu isilile ngokupheleleyo.

11 Yena uyilo “ ‘ilitshe lina abakhi elalilahlayo, khathesi eseliyinhloko yengosi.’

12 Kakho omunye okulensindiso kuye; phela kalikho elinye ibizo ngaphansi kwezulu elaphiwa abantu ukuthi sisindiswe ngalo.”

13 Bathi ngokubona isibindi sikaPhethro loJohane njalo benanzelela ukuthi ngabantu makhaza ababengafundanga, batsha amathe, bakunanzelela ukuthi amadoda la ake aphila loJesu. 14 Kodwa njengoba babeyibona indoda eyayisilisiwe imi khonapho labo, baswela ukuthi bangathini. 15 Yikho kwathiwa kabasuke emphakathini weSanihedrini umphakathi wasala uhlanganisa amakhanda. 16 Babuzana bathi, “Kambe senzeni ngamadoda la na? Bonke abahlala eJerusalema bayakwazi ukuthi benze ummangaliso obabazekayo, lathi singeke sikulandule lokho. 17 Kodwa ukuze into le siyimise ukuthi ingasabalali iye phambili phakathi kwabantu kasibaqonqosele abantu laba ukuthi bangaphindi bakhulume lakubani ngaleli ibizo.”

18 Basebebabiza njalo basebebalaya ukuthi bangaqali ukukhuluma loba ukufundisa ngebizo likaJesu. 19 Kodwa oPhethro loJohane baphendula bathi, “Kucazululeni lina ingabe kuqondile yini emehlweni kaNkulunkulu ukulalela lina kulokulalela uNkulunkulu. 20 Phela singeke sayekela ukukhuluma ngalokho esikubonileyo lesikuzwileyo.”

21 Sebebaqonqosele njalo babakhulula. Baswela ukuthi babezabajezisa njani, ngoba abantu bonke babemdumisa uNkulunkulu ngalokho okwakwenzakele. 22 Phela leyondoda eyasiliswa ngesimanga yayileminyaka engamatshumi amane ubudala.

Umkhuleko Wamakholwa

23 Ekukhululweni kwabo oPhethro loJohane babuyela exukwini labo bababikela konke okwakutshiwo kibo ngabaphristi abakhulu labadala. 24 Sebekuzwile lokhu baphakamisa amazwi abo bonke bakhuleka kuNkulunkulu. Bathi, “Nkosi ebusayo, wena wenza izulu, lomhlaba, lolwandle lakho konke okukulezi zindawo. 25 Wena wakhuluma ngoMoya oNgcwele ngomlomo wenceku yakho, ubaba uDavida wathi: “ ‘Kungani izizwe zixokozela na, labantu besakha amacebo ngeze?

26 Amakhosi omhlaba ayahloma ajame lababusi babuthane ndawonye ukumelana leNkosi bemelana njalo Laye Ogcotshiweyo.’

27 Ngempela uHerodi loPhontiyu Philathu bahlangana labeZizwe kanye labantu bako-Israyeli baceba ngenceku yakho engcwele, uJesu owamgcobayo. 28 Benza lokho okwakumiswe ngaphambili ngamandla akho layintando yakho ukuthi kwakuzakwenzakala. 29 Ngakho, Nkosi, zwana izisongo zabo uphe izinceku zakho amandla ukuthi zilikhulume ilizwi lakho ngesibindi esikhulu. 30 Yelula isandla sakho ukusilisa lokwenza imimangaliso, lezinkinga ngebizo lenceku yakho engcwele uJesu.”

31 Sebekhulekile, indawo ababekuyo yazamazama. Bonke bagcwaliswa ngoMoya oNgcwele balikhuluma ngesibindi ilizwi likaNkulunkulu.

Amakholwa Ayahlanganyela Yonke Impahla Yawo

32 Wonke amakholwa ayenhliziyo nye, engqondo nye. Kakho owathi okwakhe ngokwakhe yedwa kodwa babelana ko-nke ababelakho. 33 Abaphostoli baqhubeka ukufakaza ngamandla amakhulu ngokuvuka kukaJesu inkosi, bonke babusiseka kakhulu.

34 Kakho owayeswela phakathi kwabo. Kwakusithi izikhathi ngezikhathi labo ababe leziqinti loba izindlu bazithengise balethe imali yentengo 35 bayethule kubaphostoli yabelwe loba ngubani ngokuswela kwakhe.

36 UJosefa, umLevi waseKhuphro, abaphostoli ababembiza ngokuthi nguBhanaba (okutsho ukuthi, Ndodana yeNkuthazo),

37 wathengisa isivande esasingesakhe waletha imali wayethula kubaphostoli.